മുളങ്കടവ്, പൊന്നാങ്കയം നിവാസികളുടെ മനം കവര്‍ന്ന കുസ്യതിക്കുറുമ്പന്‍ 'ബാബുലാല്‍' എന്ന ആനക്കുട്ടി മടങ്ങിപ്പോയി. കാലിലെ നീര്‍ക്കെട്ട് പൂര്‍ണ്ണമായും ഭേദമാകാത്തതിനാല്‍ ലോറിയിലായിരുന്നു മടക്കയാത്ര. ഓമശ്ശേരി സ്വദേശിയുടെ അഞ്ചംഗ ആനക്കുടുംബത്തിലെ ഒരംഗമാണ് ബാബുലാല്‍. പൊന്നാങ്കയം ഭാഗത്ത് തടിപിടിക്കാന്‍ വന്ന മറ്റ് ആനകളുടെ കൂടെ വന്നതായിരുന്നു കക്ഷി. പാപ്പാനെ അനുസരിക്കാന്‍ മടി' വിക്യതിത്തരങ്ങള്‍ ധാരാളം കൈവശം. അസഹ്യമായ ചൂടുകാരണം പുഴയില്‍ ഇറങ്ങിയാല്‍ തിരികെ കയറാന്‍ കൂട്ടാക്കില്ല. വെള്ളത്തിലെ കളി കൂടി അവസാനം മുന്‍കാലില്‍ നീര്‍ക്കെട്ടു വന്ന് നടക്കാന്‍ പറ്റാതെയായി. ഒരാഴ്ച്ചത്തെ ആയുര്‍വേദ ചികിത്സയുടെ ഫലമായി നടക്കാമെന്നായി. തുടര്‍ന്ന് വിശ്രമത്തിനും തുടര്‍ ചികിത്സക്കുമായി ലോറിയില്‍ വീട്ടിലേക്ക് മടക്കം. തേങ്ങയും പഴവുമൊക്കെ നല്കിയാണ്. അയല്‍ വീട്ടുകാര്‍ ബാബുലാലിനെ യാത്രയാക്കിയത്.
